Korça çeli sezonin turistik veror me edicionin e 19-të të Festivalit Ndërkombëtar të Karnavalit, në një festë të jashtëzakonshme plot ngjyra, gëzim dhe performanca magjike.
Grupe nga Greqia, Rumania, Serbia, Polonia, Arbëreshët dhe mbi 25 grupe nga Korça sollën super energji, duke e kthyer çdo cep të qytetit në një skenë të hapur feste.
“Ne jemi nga Polonia. Polonia është një nga prodhuesit më të mëdhenj të mishit të patës. Prandaj këtë vit vendosëm të performojmë me këto kostume. Ne kërcejmë duke përfaqësuar patat. Patat fluturojnë së bashku në harmoni. Ato janë të guximshme, ndaj edhe ne kërcejmë duke u frymëzuar prej tyre”, tha një pjesmarrëse.
“Përshëndetje, ne jemi nga Serbia. Po paraqesim një zog pasi mendojme se njerëzit mund të fluturojnë. Njerëzit janë të mrekullueshëm dhe plot shkëlqim, ndaj përmes kësaj paraqitjeje tregojmë njerëzit që fluturojnë dhe që mund të shprehin emocionet e tyre”, u shpreh një tjetër.
“Është hera ime e parë këtu. Grupi ynë i karnavaleve ka qenë këtu rreth katër vite më parë, por për mua është vizita e parë. Deri tani po kaloj shumë bukur”, tha një tjetër.
“Vëmendja që duhet të ketë për Korçën duhet të jetë shumë e madhe dhe po punojmë shumë që të kemi jo vetëm aktivitete, jo vetëm një promovim sa më të mirë, dhe këtu bashkia është natyrisht kampione, por që të kemi gjithmonë e më shumë edhe një turizëm të organizuar”, tha Ministri Blendi Gonxhja..
“Shpresoj shumë dhe besoj që do të jetë një sezon turistik i mbarë”, theksoi kryebashkiaku Sotiraq Filo.
Edicioni i 19 i Festivalit Ndërkombëtar të Karnavaleve ishte një tjetër ditë që dëshmon se Korça është kryeqyteti i festës, traditës dhe mikpritjes, dhe një nga destinacionet më tërheqëse të sezonit./rtsh
