Pas njoftimit të Agjencisë Evropiane të Barnave se nuk ka asnjë provë që vaksina AstraZeneca shkakton mpiksje të gjakut, Italia,Letonia dhe Lituania, ndër shtetet që e kishin pezulluar injektimin e kësaj vaksine në popullatë, do të rinisin procesin e vaksinimit.
Letonia dhe Lituania do të rinisin të premten përdorimin e vaksinave kundër koronavirusit, të kompanisë AstraZeneca, kanë njoftuar ministritë e Shëndetësisë të të dyja vendeve.
Po ashtu, kryeministri italian Mario Draghi, tha se fushata e vaksinimit me AstraZeneca do të rifillojë të premten.
Komiteti i sigurisë së Agjencisë Europiane të Barnave deklaroi në mbledhjen e tij urgjente për vaksinën e AstraZeneca se ajo është e sigurt, e efektshme dhe përfitimet janë më të mëdha se rreziqet.
Më herët, edhe Organizata Botërore e Shëndetësisë kërkoi që procesi i vaksinimit me AstraZeneca të vijojë.
