Albulena Balaj Halimaj ka publikuar një foto nga tryeza ku do të mbahet takimi i dy qeverive.
Në foton që ka publikuar Deputetja e Kuvendit të Kosovës, duket edhe slogani i këtij takimi:
“Bashkë pa kufij. Me një rajon pa kufi” , shkruhet në mesin e tryezës.
Qeveria e Kosovës me autobus drejt Tiranës, Hoti publikon foto nga udhëtimi: Për pak takohemi…
Kabineti i qeverisë së Kosovës me në krye Avdullah Hotin janë nisur drejt Tiranës për të marrë pjesë në mbledhjen e gjashtë të përbashkët mes dy qeverive.
Hoti ka publikuar një foto në twitter gjatë udhëtimit me autobus.
“Bashkë me kabinetin rrugës për Shqipëri. Për pak takohemi me kolegët tanë nga Qeveria e Republikës së Shqipërisë, në Pallatin e Kongreseve në Tiranë” shkruan Hoti në twitter.
Takimi i dy qeverive do të zhvillohet në Pallatin e Kongreseve në orën 11:00, ndërsa më parë ishte programuar që kjo mbledhje të zhvillohej në Shkodër.
Dy kryeministrat Rama e Hoti do të kenë një konferencë të përbashkët për mediat në përfundim të mbledhjes.
Nuk ka një axhendë të temave që do të diskutohen dhe do të bihen dakord, ndërsa në takimin e tyre të fundit zyrtar, Rama dhe Hoti kanë folur për projekte të përbashkëta. Këto projekte duhen parë dhe nën dritën e takimit që Hoti dhe Vuçiç zhvilluan në Shtëpinë e Bardhë në Uashington në praninë e Presidentit Donald Trump, ku për Kosovën u premtua një mbështetje e konsiderueshme ekonomike nga SHBA.
Në takimin e fundit me homologun e tij në Tiranë, Kryeministri kosovar, Hoti, foli për tri projekte strategjike siç janë pika doganore në Durrës, HEC-i në Shqipëri për të furnizuar Kosovën dhe linja e përbashkët hekurudhore mes dy vendeve.
Kosova dhe Shqipëria nënshkruan në mbledhjen e fundit të dy qeverive në Pejë, dy vjet më parë, disa marrëveshje, me të cilat brenda gjashtë muajve unifikohen doganat, hiqet romingu dhe parashikohen masa të tjera.
