Ndërkohë që vijon numërimi i votave në shtetet kyçe që do të vendosin fatin e zgjedhjeve, Presidenti Donald Trump, ka dhënë një mesazh televiziv nga Shtëpia e Bardhë.
Trump tha se ai i ka fituar zgjedhjet, por sugjeroi se ato po manipulohen nga kampi kundërshtar. Presidenti paralajmëroi se do të shkojë në Gjykatën Supreme, por pa shpjeguar arsyet përse do të shkojë.
“Ky është një mashtrim ndaj popullit tonë, është një turp për popullin tonë. Ne po bëheshim gati t’i fitonim zgjedhjet dhe ne i fituam zgjedhjet. Ky është mashtrim i madh për kombin tonë. Ne do të shkojmë në Gjykatën Supreme. Ne duam të ndalojë votimi, që të mos shtohen votat“, tha ndër të tjera Presidenti.
Trump nuk paraqiti asnjë provë se si po manipulohen zgjedhjet, ndërkohë që votat vijojnë të numërohen.
Pritet që shtet kyçe të vendosin fatin e zgjedhjeve dhe nuk ka asnjë provë konkrete, që procesi i numërimit të ketë parregullësi.
Më herët Trump ka deklaruar në Twitter se kundërshtarët “po mundohet të vjedhin zgjedhjet”, një deklaratë kjo mjaft e rëndë dhe e pabazuar në fakte, të cilën edhe vetë Twitter e censuroi, duke e shoqëruar me njoftimin se kjo deklaratë mund të përmbajë informacion të rremë.
Nga ana tjetër, Joe Biden, është shprehur, se i takon votuesve të vendosin fatin e zgjedhjeve dhe jo kandidatëve.
“Nuk jam unë apo Presidenti Trump, ata që duhet të deklarojnë fituesin e zgjedhjeve. Është vendimi i votuesve”, shkroi Biden. Më pas ai shtoi se “ne ndihemi mirë për pozicionin ku jemi. Besojmë se jemi në rrugën e duhur për të fituar këto zgjedhje”.
