Më shumë se 20 vjet pas luftës, Cahan i Hasit rikthehet në qendër të kujtesës përmes përurimit të një pllake përkujtimore në Kullën e Elez dhe Fasli Cahanit, një ish-bazë e rëndësishme e UÇK-së. Ceremonia, e zhvilluar me praninë e figurave të njohura të luftës dhe komunitetit, vlerësoi rolin strategjik të këtij fshati në rezistencën për liri.
Më shumë se dy dekada pas përfundimit të luftës në Kosovë, fshati Cahan i Hasit, rikthehet në qendër të kujtesës kolektive kombëtare. Në zemër të këtij fshati që kufizohet me rrjedhat e historisë dhe kufijtë shtetërorë, Kulla e Elez dhe Fasli Cahanit,dikur vendstrehim për ushtarë dhe strategji, sot është kthyer në një simbol të krenarisë dhe rezistencës.
Organizata e Veteranëve të Luftës së UÇK-së, dega në Has, ka përuruar një pllakë përkujtimore në nderim të rolit kyç që kjo kullë dhe ky vend luajtën gjatë viteve të luftës. Kulla, që dikur ishte jo vetëm shtëpi por edhe bazë e Shtabit të Përgjithshëm të Ushtrisë Çlirimtare të Kosovës, sot mban mbi vete kujtimin dhe lavdinë e një kohe që ka lënë gjurmë të thella në shpirtin e shqiptarëve.
Në ceremoninë përkujtimore, të pranishëm ishin figura të njohura të luftës dhe komunitetit lokal. Kryetari i degës së OVL-UÇK-së në Has, Xhevdet Thaçi, vlerësoi Cahanin si një nga nyjet strategjike të organizimit dhe furnizimit të UÇK-së, një portë hyrëse drejt zonave të luftës në Kosovë, dhe një strehë për të plagosurit dhe luftëtarët.
Mahir Hasani, ish-epror i UÇK-së, rikujtoi ditët kur çdo hap në Cahan mbartte rrezik, por edhe vendosmërinë për liri.
Në emër të familjes Cahani, Imer Cahani shprehu mirënjohjen e thellë për këtë akt përkujtimor.
Ceremonia shënoi një tjetër gur themeli në ruajtjen e memories së luftës së UCK-së dhe nderimin e sakrificës së atyre që nuk kursyen as jetën për të ardhmen e një kombi.
