Ballkani i Hapur ishte pjesë e diskutimit të panelit “Siguria, rajoni, bota” në Kongresin e Partisë Socialiste.
Ministrja e Jashtme, Olta Xhaçka, në fjalën e saj pranoi se nisma dhe përfshirja e Shqipërisë në të ka sjellë shqetësim te një pjesë e forcave politike dhe të shoqërisë shqiptare në rajon, duke e kuptuar nismën si një zbehje të mbështetjes së Shqipërisë ndaj Kosovës.
Por Xhaçka nënvizoi se e kundërta është e vërtetë, duke theksuar se Kosova dhe kauza e shqiptarëve në rajon mbeten të shenjta për Shqipërinë.
Xhaçka: Puna për nismën e Ballkanit të Hapur ka shkaktuar shqetësim te një pjesë e forcave politike dhe të shoqërisë shqiptare në rajon, të cilët e kanë kuptuar këtë nismë si një zbehje të mbështetjes së Shqipërisë ndaj Kosovës. E vërteta nuk është kjo, Kosova për ne është e shenjtë ashtu siç është e shenjtë kauza e shqiptarëve në rajon. E vërteta është shumë më e thjeshtë dhe ka dy pjesë: Në njërën anë kjo nismë është një mekanizëm që zbaton dhe përshpejton proceset e parashkuara në procesin e Berlinit, pëshpejtim që sjell përfitime konkrete për të gjithë rajonin, përfshirë shqiptarët. Nga ana tjetër është dimensioni strategjik i kësaj nisme që ashtu si procesi i Berlinit ngrihet mbi filozofinë që zgjidhja e problemeve që ka sot rajoni kalon nga bashkëpunimi dhe integrimi.
