Kryeministri Edi Rama mbërriti mëngjesin e sotëm në Aeroportin e Prishtinës “Adem Jashari” ku u prit nga ministrja e Zhvillimit Ekonomik, Artane Rizvanolli dhe ministri i Kulturës, Hajrullah Çeku. Vizita një ditore e kreut të shtetit në Kosovë, vjen pas ftesës së kryeministrit Albin Kurti, i cili e uroi për fitoren e mandatit të tretë. Në vizitën e tij në Kosovë, Rama u shoqërua nga një pjesë e kabinetit të tij, Taulant Balla, Elisa Spiropali, Edona Bilali, Bledi Çuçi, Evis Kushi, Mirela Kumbaro, Elva Margariti dhe Eduard Shalsi.
Rama u prit me një ceremoni shtetërore nga Kurti dhe anëtarët e kabinetit qeveritar. Të dy kryeministrat u takuan me grusht me njëri-tjetrin, mirëpo Rama zgjodhi që zyrtarëve të Kosovës tu jepte dorën. Kjo nuk u bë nga ana e Kurtit, i cili zgjodhi që të respektonte masat anti covid deri në fund, duke iu drejtuar me grusht. Rama me Kurti, me maska u drejtuan për në kryeministri aty ku po zhvillojnë takimin mes tyre.
“Kryefjalë” e bisedimeve mes tyre do të jetë çështja e reciprocitetit, ku Rama e ka bërë edhe më parë me dije qëndrimin e tij, duke kërkuar dialog nga të dyja palët. Ndërkohë mësohet se pjesë e bisedës do të jetë edhe nisma “Ballkani i Hapur”, për të cilën deri më tani Kosova e ka refuzuar që të marrë pjesë. Pas takimit, Kurti dhe Rama do të mbajnë një konferencë për media në orën 10:20. Më pas, kreu i qeverisë Rama do të takohet me tre liderët e opozitës: Ramush Haradinaj, Memli Krasniqi dhe Lumir Abdixhiku. Po ashtu, gjatë qëndrimit në Kosovë, Rama do të dekorojë edhe akademikun, Rexhep Qosja.
