Arqipeshkvi Metropolit Tiranë Durrës, Imzot George Frendo, në prag të festës së Krishtlindjeve u ka bërë thirrje politikanëve shqiptarë të mos mendojnë për interesat e tyre personale dhe partiake, por për të mirën e përbashkët të vendit dhe të qytetarëve.
“Krishtlindja na kujton se nuk kemi të drejtë ta mbajmë gëzimin tonë vetëm për vete. Gëzimi është një nga frytet e Shpirtit Shenjt, që duhet ta ndajmë dhe ta përhapim me të tjerët” tha imzot Frendo në mesazhin e urimit për të gjithë shqiptarët dhe besimtarët e krishterë.
“Fute dorën në xhep, nxirr lekë sa të mundesh, jepua të varfërve. Edhe ata kanë të drejtë për pak gëzim. Në këtë mënyrë të siguroj se do të bëhesh më i pasur sesa ke qenë më parë, sepse ke fituar një thesar në qiell” tha ai.
“Një komb është i fortë kur kujdeset për të dobëtit; bëhet i pasur kur kujdeset për të varfrit; bëhet i palëndueshëm kur kujdeset për të lënduarit. Nëse interesohemi për të ardhmen e demokracisë, duhet të rizbulojmë atë qëndrim moral që na bashkon njëri me tjetrin në një lidhje dhembshurie dhe kujdesi të ndërsjelltë”, ka thënë Arqipeshkvi Metropolit Tiranë Durrës, Imzot George Frendo në mesazhin e tij.
