Presidenti Meta reagoi pak ditë pas sekuestrimit të një sasie të madhe drogë në Turqi e cila dyshohet se vinte nga Shqipëria nëpërmjet rrugëve detare.
Kreu i Shtetit shton se trafikimi i hashashit vijon me ritme të larta në vend, dhe kjo sipas Metës, dëshmohet nga kjo sasi rekord droge e kaluar nga Shqiperia drejt Turqisë.
Me mjaft shqetësim kam përcjellë kapjen pranë Izmirit të një sasie rekord droge të nisur në rrugë detare nga Shqipëria.1,5 ton drogë përbën një nga sasitë më të mëdhaja të trafikuar nga Shqipëria në Turqi në rrugë detare, çka tregon se prodhimi i hashashit, në këtë rast i llojit më të fundit skunk, dhe trafikimi i tij nga grupet e krimit të organizuar, vijon me ritme të larta në vend.
Meta i bën thirrje Qeverisë, institucioneve ligjzbatuese dhe të sigurisë në vend, që të tregojnë vullnetin e duhur politik, si dhe të forcojnë kapacitetet profesionale dhe bashkëveprimin në terren, për të parandaluar raste të tilla, që sipas tij, përbëjnë rekorde të zeza për vendin.
Gjithashtu, apeloj për hetimin e plotë dhe të thellë të këtij trafiku kriminal dhe sjelljen përpara drejtësisë të të gjithë atyre që qëndrojnë pas tij.Po kështu, i bëj thirrje Kuvendit të rrisë rolin e tij në mbikëqyrjen e luftës kundër trafikut të drogave dhe krimit të organizuar.
