Një ditë pas ndarjes nga jeta të studiuesit të shquar Aleks Luarasi, ka reaguar përmes një mesazhi ngushëllimi presidenti Ilir Meta, i cili e konsideron profesorin si një prej ikonave të jurisprudencës shqiptare, simbol të vlerave arsimdashëse dhe intelektuale të vendit.
“Urtësia, mençuria, vullneti dhe vizioni i Profesor Luarasit do të na mungojnë të gjithëve!”, shprehet Meta në një mesazh në rrjetet sociale, duke e mbyllur me fjalët: “Ngushëllime familjes dhe botës akademike shqiptare për këtë humbje të pazëvendësueshme! Të prehet në paqe!”
Mesazhi i Metës
I japim sot lamtumirën e fundit njërit prej ikonave të jurisprudencës shqiptare, Profesorit të nderuar Aleks Luarasi, simbol i vlerave arsimdashëse dhe intelektuale të shoqërisë dhe kombit shqiptar.
Pioner i guximshëm i modernizimit të sistemit tonë arsimor, kontributi i tij mjaft i spikatur në fushën e mendimit bashkëkohor juridik, në jetën akademike, në institucionet qeverisëse, në forumet ndërkombëtare dhe në shumë angazhime të tjera profesionale me rëndësi madhore në proceset demokratizuese në vend do të mbetet përherë i respektuar.
Urtësia, mençuria, vullneti dhe vizioni i Profesor Luarasit do të na mungojnë të gjithëve!
Ngushëllime familjes dhe botës akademike shqiptare për këtë humbje të pazëvendësueshme!
Të prehet në paqe!
