Dy shtetas shqiptarë kanë rënë në prangat e policisë greke, pasi akuzohen nga autoritetet ligjzbatuese të shtetit fqinj se kanë filmuar objektet e kampit ushtarak në malin Egaleo, në Atikë.
Lajmi është bërë publik nga mediat greke, ku theksohet se gjithçka ka ndodhur pasditen e 28 tetorit. Dy burrat hynë në kampin e artilerisë “Major Stefanakis” në malin Egaleo dhe më pas bënë video dhe foto nga instalimet ushtarake aty. Një toger në detyrë i pa dhe u kërkoi të ndalonin. . Njëkohësisht ai ka njoftuar menjëherë Policinë, e cila ka dalë me shpejtësi në vendngjarje dhe ka vënë në pranga dy personat.
“Kjo është e vërtetë. Ne po përpiqeshim të gjenim një rrugëdalje. Menduam se ishte një vend që ishte braktisur sepse telat kishin rënë. Kemi kërkuar ndihmë edhe nga një ushtar. Fotot ia treguam policisë. Kemi humbur dhe nuk kemi ditur të largohemi nga vendi i ngjarjes”, ka thënë sipas informacioneve njëri nga dy të pandehurit.
“Ne jemi nisur nga Kopshti Botanik në Haidar bashkë me katër persona të tjerë dhe në një moment kemi humbur”, -shtoi ai në dëshminë e tij.
Avokatët mbrojtës të dy të pandehurve, Mariolis Panagiotis dhe Nakou Theano, theksuan se ishte “një shëtitje e rastësishme në një vend ku nuk ka rrethim apo shënjim të hapësirës ushtarake” që “rezultoi në arrestimin e dy të rinjve dhe i solli ata të përballen me një aktakuzë të rëndë. Mezi presim lirimin e tyre sapo të dalin në dritë faktet vendimtare të ditës së arrestimit të tyre”.
Media greke, shkruan se bëhet fjalë për një rast të ri spiunazhi nga ana e shqiptarëve që fotografuan kampin në Atikë.
