Gazetarja franceze Saliha Hadj Djilad, ka xhiruar një reportazh duke promovuar Shqipërinë. Në reportazhin e kuruar mirë bien në sy vende magjike nga gjithë Shqipëria. Pjesë e reportazhit është edhe këngëtarja Dua Lipa gjatë vizitës së fundit në Tiranë.
Një pikë e fortë promovimi janë edhe kufizimet inegzistente anti-Covid që ka Shqipëria, pasi shumë turistë nuk janë të detyruar të mbajnë maskë, të kenë test PCR apo pasaportë vaksinimi.
Duke u kthyer pas në kohë gazetarja franceze bën krahasimin midis komunizmit dhe zhvillimit të madh që turizmi ka marrë pas viteve 1990.
Jugu i Shqipërisë i është dukur parajsë dhe me çmime shumë të lira. Ndoshta duhet bërë një saktësim sepse për standartin francez mund të jenë shumë të lira por për atë realitetin ku jetojmë ne, me rrogat që marrin shqiptarët faturat janë të kripura.
Në reportazh gjithashtu përmendet se Tirana ka një arkitekturë fantastike se ” Shtëpia me Gjethe” dhe ” Bunkart” janë një dëshmi e gjallë e komunizmit.
Deri këtu reportazhi është për tu vlerësuar, por nga fundi fillojnë edhe pasaktësitë, në mos jo deformimet me dashje.
”Tirana është një qytet largë të qenit i betonizuar dhe një qytet i gjelbër.”- Kjo frazë është mungesë profesionalizmi për një gazetare pasi kemi të bëjmë me një gënjeshtër.
Ndoshta Saliha Hadj Djilad ka vizituar ”pyllin orbital”, por ai nuk egziston. Dhe e vërteta duhet thënë edhe kur mbreti është ”lakuriq”.
Nëse gazetarja në fjalë ka vizituar ” Shtëpinë me gjethe” do ta ketë vënë re edhe një përbindësh gjigand betoni që shtrihet pranë kësaj shtëpie. Jo vetë kaq, por në Tiranë po mbijnë aq shumë pallate e kulla sa nuk bën punë as propaganda e Erion Veliajt për të ndrydhur realitetin ku për çdo pemë të mbjellë mbijnë dy pallate.
Jo vetëm kaq por gazetarja flet edhe për arkitekturën dhe trashëgiminë kulturore. Ndryshe nga reportazhi, çdo ditë e më tepër në Tiranë ka një luftë të hapur ndaj vendeve të trashëgimisë kulturore.
Strategjia e ndjekur për shembull me vilat e vjetra tiranase është: Leri të shkatërrohen nga vitet dhe më pas prishi për të ndërtuar pallate.
Reportazhi ishte shumë i mirë, urojmë që shumë francezë të binden të vizitojnë Shqipërinë. Vendi jonë është një perlë turistike, por edhe ca saktësime duhen bërë. Që edhe francezët të mos zhgënjehen me realitetin diku aty-këtu pak më ndryshe. /Express
