Ky vendim erdhi pas zërave të shumta që nisën në rrjet pasi u zbulua se Krasniqi ishte i vetmi këngëtar nga Kosova që do performonte.
Këngëtari Shemsi Krasniqi ka vendosur të mos marrë pjesë në festivalin e Korçës. Ky vendim erdhi pas zërave të shumta që nisën në rrjet pasi u zbulua se Krasniqi ishte i vetmi këngëtar nga Kosova që do performonte. Ai shprehet se ka vendosur që të tërhiqet pasi shumica prej personave i kanë kërkuar të mos marrë pjesë.
“Të nderuar qytetarë, vëllezër dhe motra shqiptare. Dua të them disa fjalë lidhur me këtë koncertin në Korçë që ka bërë bujë të madhe. Unë e kam menduar se kjo ka lidhje me art, por e shof që kjo s’ka fare lidhje me art. Kjo ka marrë një konotacion politik dhe unë për këtë shkak ka vendosur të tërhiqem nga ky event, edhe për shkak se shumica prej jush më ka sugjeruar të mos marrë pjesë në këtë event. Unë do ta respektoj shumicën si në zgjedhje dhe do të kaloj në opozitë. Pavarësisht se ka patur sharje, ofendime, unë nuk do të shkoj në Korçë. Pavarësisht se kam patur një dëshirë të flakët të këndoj në Korçë se s’kam kënduar asnjëherë. Kam pat dëshirë ta këndoj aty “Xhamadanin vija, vija”, “Këngën e Adem Jasharit”. Unë nuk do të jem aty”, tha ndër të tjera Shemi.
Bregoviç nuk do të këndojë falas për popullin shqiptar më 22 gusht. Bileta për ta parë atë do të jetë 10 mijë lekë të vjetra (ose një mijë lekë të reja). Pozicioni për këtë çmim është në largësi të skenës ndërsa afër saj nuk dihet ende sa mund të jetë çmimi.
Ardhja e Bregoviç-it në Shqipëri është kundërshtuar nga pjesa më e madhe e artistëve dhe personave publik e të thjeshtë pasi mendojnë që arti po ‘përzihet’ me politikë, por Bashkia e Korçës është shprehur se tashmë kontratat janë mbyllur të gjitha. Goran Bregoviç do të këndojë para shqiptarëve në natën e fundit të këtij eventi.
