Ambasadori Izraelit në Serbi, Jahel Vilan, tha se vendi i tij e ka njohur pavarësinë e Kosovës, falë presionin të Shteteve të Bashkuara të Amerikës.
“Mos më keqkupto, kjo është një temë e rëndësishme, por është një histori tjetër. Vendimi i Izraelit për të njohur pavarësinë e Kosovës u bë nën presionin amerikan, përndryshe mos të harrojmë se u bë brenda kornizës së marrëveshjes në mes Serbisë dhe Kosovës me Amerikën, jo me ne”, tha ai për TV Prva.
Gjatë kësaj interviste ambasadori Vilan aludoi se në marrëveshjen e Uashingtonit të vitit të kaluar mes Kosovës dhe Serbisë, kjo e fundit e ka njohur Kosovën si shtet të pavarur, derisa e ka përjashtuar mundësinë që vendi i tij ta tërheq njohjen e Kosovës si shtet.
“Unë nuk pashë ndonjë mohim nga Serbia dhe Amerika. Serbia kurrë nuk e mohoi që ajo të nënshkrua. Unë nuk pashë askënd në Serbi të thoshte se ata nuk nënshkruan marrëveshje, dokumenti ekziston me sa di unë”, shtoi ai.
Por, kësaj deklarate të ambasadorit Vilan se Serbia e ka njohur Kosovën, i është kundërpërgjigjur ministri i Punëve të Jashtme të Serbisë, Nikola Selakoviç, duke thënë se “deklarata e ambasadorit izraelit se Serbia “njohu” Kosovën është absolutisht e pasaktë”. /Albanianpost
