Rrjeti social “Facebook” u ka bërë thirrje partive politike shqiptare që të tregohen transparente për mënyrën se si financojnë reklamat politike në llogaritë e tyre gjatë fushatës zgjedhore.
Siç raporton “Associated Press”, Facebook thotë se: “Duke filluar nga e enjtja, të gjitha reklamat politike në lidhje me zgjedhjet në Shqipëri duhet të bëhen nga reklamues të autorizuar dhe të përfshijnë emrin e personit apo kompanisë që e paguan reklamën dhe autorizimi për këto reklama duhet të vijë nga brenda vendit”.
Shqipëria mban zgjedhjet parlamentare në 25 Prill. Për shkak të pandemisë së koronavirusit, fushata elektorale do të zhvillohet në një pjesë të madhe në rrjetet sociale, përfshirë edhe Facebook-un.
Ndërsa i referohet masave kufizuese në Shqipëri, “Associated Press” shkruan se vendi ka masa të rrepta pandemike, duke përfshirë përdorimin e detyrueshëm të maskave dhe asnjë mbledhje me më shumë se 10 persona.
