Është ndarë sot nga jeta në moshën 78-vjeçare, aktori Andon Qesari me titull “Artist i Merituar”. Qesari u nda nga jeta pas një sëmundjeje të rëndë me të cilën luftoi për vite me radhë.
Lajmin për ndarjen nga jeta e ka dhënë i biri, Edon Qesari përmes një postimi në rrjetet sociale.
”Të dashur miq e të njohur, Sot në mëngjes, pas një sëmundje të gjatë, e cila e kishte rënduar dhe sfilitur shumë në vitin e fundit, i dashuri babai im ANDON QESARI u nda nga jeta në moshën 78-vjeçare. Dashuria e Tij e pamat për ne, familjarët dhe njerëzit e tij të afërt, përpjekjet për të na dhënë një jetë me dinjitet dhe begati, pasioni i vyer artistik që e shoqëroi gjatë gjithë jetës dhe shënoi një karrierë të paharrueshme në teatrin shqiptar dhe studimin e artit, humori i hollë që e spikaste, janë trashëgimi më i çmuar që na la. Të dua Ba’ dhe mirupafshim në një jetë më të mirë…”, shkruan ai.
I lindur në fshatin Qeparo në Vlorë më 27 qershor të vitit 1942, Andon Qesari u diplomua si aktor në vitin 1966 në shkollën “Aleksandër Moisiu”.
Qesari ka luajtur me dhjetra role në filma dhe teatër ndërsa njihet si regjisori i sukseseve “Karnavalet e Korçës”, Pallati 176″ apo ‘Në jetë”. Ai mbante titullin “Artist i merituar”.
