Më 20 maj të vitit 1903 lindi në qytetin e Shkodrës, Ernest Koliqi, shkrimtar, studiues, përkthyes dhe pedagog.
Koliqi pati një ndikim të thellë në mendimin dhe kulturën shqiptare të shekullit XX. Ai u edukua në Kolegjin Saverian dhe u diplomua për letërsi në Universitetin e Padovës.
Ernest Koloqi arriti të ndërthurte traditën shqiptare me frymën moderne europiane, duke sjellë një qasje të re në letërsinë dhe kritikën letrare. Vlerësohet si themelues i novelës moderne shqiptare, pasi përmes veprave si “Hija e Maleve” dhe “Tregtar Flamujsh” ai, solli stil të ri narrativ dhe psikologjik në prozën shqipe.
Përtej krijimtarisë letrare, Ernest Koliqi dha një kontribut të rëndësishëm në arsim dhe kulturë si ministër i Arsimit (1939–1941), duke ndikuar në hapjen e shkollave shqipe në Kosovë dhe Maqedoni, si dhe në promovimin e gjuhës dhe kulturës shqiptare përmes botimeve dhe revistës letraro-kulturore “Shkëndija”.
Përmes botimit të serisë folklorike “Visaret e Kombit” dhe drejtimit të katedrës së gjuhës shqipe në Universitetin “La Sapienza”, ai kontribuoi në ruajtjen dhe promovimin e trashëgimisë kulturore shqiptare edhe në diasporë dhe në arenën ndërkombëtare.
Ernest Koliqi u nda nga jeta më 15 janar 1975.
