Një ditë para se ti dorëzojë detyrën Joe Bidenit, Donald Trump ka mbajtur një fjalim lamtumire në Shtëpinë e Bardhë.
Gjatë fjalimit të tij, Trump tha se administrata e tij kishte bërë shumë për vendin, për të vënë Amerikën të parën, por se virusi kishte ndryshuar gjithçka. Megjithatë pavarësisht virusit, Trump thotë se kur “E gjithë bota vuajti, Amerika i tejkaloi vendet e tjera ekonomikisht për shkak të ekonomisë sonë të pabesueshme dhe ekonomisë që ndërtuam.“
Trump foli dhe për trazirat e 6 janarit në Kapitol, ku theksoi se dhuna nuk mund të tolerohet.
“Të gjithë amerikanët u tmerruan nga sulmi ndaj Kapitolit tonë. Dhuna politike është një sulm ndaj gjithçkaje që ne vlerësojmë si Amerikanë. Asnjëherë nuk mund të tolerohet.”– tha presidenti i SHBA-ve.
Ndërsa rendiste gjithçka që administrate e tij ka bërë në këto katër vjet, Trump tha: “Ne bëmë atë që kemi ardhur këtu për të bërë dhe shumë më tepër. Unë mora betejat e vështira, luftimet më të vështira, zgjedhjet më të vështira, sepse për këtë më zgjodhët të bëj”.
Por mbi të gjitha ai thekson: “Unë jam veçanërisht krenar që jam presidenti i parë në dekada që nuk ka filluar asnjë luftë të re.”
Ai i uroi suksese për herë të parë dhe Joe Bidenit në detyrën e re: “Këtë javë, ne përurojmë një administratë të re dhe lutemi për suksesin e saj në mbajtjen e Amerikës të sigurt dhe të begatë. Ne i shprehim urimet tona më të mira, dhe gjithashtu duam që ata të kenë fat – një fjalë shumë e rëndësishme kjo”.
Pavarësisht urimeve të mira për Bidenit, Trump paralajmëroi se rreziku më i madh me të cilin tani përballet vendi ishte një humbje e besimit.
“Tani, ndërsa largohem nga Shtëpia e Bardhë, kam reflektuar mbi rreziqet që kërcënojnë trashëgiminë e paçmuar që ne të gjithë ndajmë.
Si kombi më i fuqishëm i botës, Amerika përballet me kërcënime dhe sfida të vazhdueshme nga jashtë. Por rreziku më i madh me të cilin përballemi është humbja e besimit te vetja, humbja e besimit te madhështia jonë kombëtare. Një komb është po aq i fortë sa shpirti i tij.
Ne jemi vetëm dinamikë si krenaria jonë. Ne jemi po aq të gjallë sa besimi që rreh në zemrat e njerëzve tanë.”– tha Trump.
