“100-Vjetori i Vrasjes së Luigj Gurakuqit sipas dokumenteve të Arkivit të Kroacisë”, ishte emërtimi i ekspozitës dokumentare që sjell për herë të parë në Shkodër materiale arkivore të panjohura mbi figurën e një prej personaliteteve më të mëdha të kombit shqiptar.
Prof. Dr. Skënder Asani, studiues, u shpreh se: “Duke hulumtuar arkivin qendror të Kroacisë unë kam hasur në dokumenta se përveç vrasjes së Luigj Gurakuqit, vrasësi ka shkuar të vrasë dhe disa atdhetarë të tjerë në Kroaci, të cilët janë shpërngulur nga Shqipëria kur kthehet mbreti Zog.”
Rektori Gjuraj theksoi se misioni i universitetit është të kthejë vëmendjen te figurat që kanë ndikuar në formësimin e shtetit shqiptar, duke i afruar ato me brezat e rinj.
Prof. Dr. Tonin Gjuraj, Rektor i Universitetit “Luigj Gurakuqi”, theksoi se: “Për mua si drejtues i këtij institucioni, i cili mbart emrin e këtij patrioti të madh, këtij humanisti të madh, ajo që unë vlerësoj është kontributi i tij sidomos në arsimin kombëtar. Nuk besoj se ka ndoshta një tjetër figurë të kombit tonë që kuptoi shumë më mirë se sa të tjerët nevojën dhe rëndësinë e gjuhës dhe arsimit për qytetarinë evropiane dhe për ndërtimin e një shteti modern shqiptar.”
Ekspozita paraqet një sërë dokumentesh, fotografish dhe materialesh të siguruara nga Arkivi Shtetëror i Kroacisë, të cilat hedhin dritë mbi rrethanat, jetën politike dhe profilin e shumëanshëm të Luigj Gurakuqit. Ajo do të qëndrojë e hapur për vizitorët në mjediset e Bibliotekës Shkencore.
Gazetar: Marjo Gjini
/rtsh.al/
