Në emisionin ‘Odeon’, arkeologu Neritan Ceka dhe kritiku i artit Andi Tepelena denoncuan skandalin e ndërhyrjeve mbi Via Egnatian, duke e quajtur shkatërrim të një pasurie historike në emër të interesave elektorale. Ata kërkuan ndërhyrje urgjente, heqjen e asfaltit dhe shpalljen e rrugës monument kulture, sipas standardeve ndërkombëtare të mbrojtjes.
Në emisionin ‘Odeon’, çështja e ndërhyrjeve të pakontrolluara mbi rrugën antike Via Egnatia u trajtua si një nga rastet më flagrante të shpërfilljes ndaj trashëgimisë kulturore. Arkeologu Neritan Ceka dhe kritiku i artit Andi Tepelena e dënuan me tone të ashpra gjendjen aktuale, duke paralajmëruar se një monument i rrallë historik po shkon drejt shkatërrimit.
Ceka pohon se nisma lokale për hapjen e rrugëve dytësore, deri edhe hedhja e zhavorrit mbi kalldrëmin antik, e kanë vënë seriozisht në rrezik. Nga ana tjetër, Tepelena e cilësoi ndërhyrjen me asfalt si kulmi i injorancës dhe arrogancës, duke e lidhur me logjikën e fushatave elektorale.
Ceka dhe Tepelena theksuan nevojën për një ndërhyrje të menjëhershme duke kërkuar mbrojtje institucionale, restaurim sipas standardeve ndërkombëtare dhe heqjen e çdo ndërhyrjeje të paligjshme që deformon vlerat e rrugës së lashtë./SYRI.net
