Kostumet tradicionale janë rikthyer në qendër të vëmendjes, duke u preferuar si nga vendasit për festa familjare dhe evente kulturore, ashtu edhe nga turistët, të cilët shfaqin interes gjithnjë e më të madh për të provuar dhe përjetuar një pjesë të kësaj trashëgimie të rrallë.
“Në shenjë respekti, dëshire apo dashurie për bukurinë apo historinë që mund të dinë për kostumin, porositin elementë ose të gjithë kostumin. Ndërsa nga shqiptarët, si këta vendas, dhe ata që jetojnë jashtë, interesi është qoftë për prindërit, qoftë në kujtim të të parëve të tyre. Vijnë me fotografi në duar të përjetësojnë atë emocion”, shprehet artizania Eli Zhulati.
Kostumet që artizanët gjirokastritë punojnë janë të shumta, por më tepër të trevës së jugut. Sipas tyre, këto veshje kërkohen më shumë.
“Duke qenë se unë punoj me porosi dhe duke qenë se jam gjirokastrite nuk mund të them që po, unë bëj edhe të Malësisë, edhe Tiranës, Shqipërisë së Mesme, sepse çdo zonë ka të veçanta. Më së shumti këtu punohen të trevës së jugut”, tha ajo.
Të punuara me dorë nga duar mjeshtërore, kostumet e Gjirokastrës nuk janë thjesht veshje. Ato janë histori të gjalla të qëndisura me kujdes, që flasin për identitetin, zakonet dhe shpirtin e jugut shqiptar.
– RTSH-
