10 shtator/ATSH/ Më 10 shtator 1922, u mblodh Kongresi i Beratit me përfaqësues ortodoksë nga mbarë Shqipëria. Të nesërmen e kësaj dite, më 11 shtator 1922, u çelën punimet e Kongresit dhe më 12 shtator, u shpall mëvetësimi dhe kombëtarizimi i Kishës Ortodokse në Shqipëri.
Statuti i KOASH-it u miratua në Kongresin e dytë kishtar ortodoks. Ky Sinod u mblodh në Mitropolinë e Korçës nën kryesinë e Kryeepiskopit Visarion, më 16 qershor 1929.
Statuti sanksionoi Autoqefalinë e deklaruar në Berat, duke qenë dogmatikisht e bashkuar me patriarkanat e shenjta dhe me kishat e tjera ortodokse autoqefale.
Administrativisht Kisha Ortodokse Autoqefale Shqiptare mbetej tërësisht më vete nën flamurin kombëtar. Kongresi vendosi për pavarësinë e Kishës Ortodokse Shqiptare dhe për të drejtën e zgjedhjes së kryepeshkopit dhe të klerikëve të lartë me prejardhje shqiptare.
Në statut thuhej se gjuha zyrtare e kishës do të ishte shqipja.
