Për të 13-tin vit Korça mirëpriti Koloninë Ndërkombëtare Ditët e Mios. Në qytetin juglindor u bënë bashkë më shumë se 50 piktorë nga 15 shtet të ndryshme të botës.
Ata hodhën frymëzimin e tyre në telajo ndërsa u realizuan 52 piktura.
Shumë prej artistëve vijnë për të disatën herë në Koloninë e Artit ndërsa kishte edhe nga ata piktorë që u rikthyen pas disa viteve mungesë.
“Në telajo arrita që ta paraqes një detaj të cilin po të kalosh nga pedonalja të lë goxha përshtypje, ky objekt, kjo arkitekturë interesante e shtëpisë rumune. U mundova ta paraqes sa më mirë me këto ngjyrat e vjeshtës.”
“Ditët këtu i kaluam shumë mirë. Njohëm njerëz shumë të dashur edhe shpresoj të vij prap këtu.”
Piktorët shkëmbyen edhe eksperiencat e tyre me njëri tjetrin.
“Ka qenë një koloni shumë e mirë. Ata kanë njohur Korçën me peisazhet e mbrekullueshme. Janë njohur me njëri tjetrin dhe kanë shkëmbyer përvoja dhe eksperienca fantastike.”
Përmes aktiviteteve të kësaj natyre synohet që Korça të kthehet në qendrën e artit pamor në rajon.
