Publikimi i komunikimeve elektronike mes zyrtarëve të lartë të Policisë së Shtetit, nga hakerat e grupit “Homeland Justice” ditën e sotme, kanë zbuluar dhjetëra sekrete të uniformave blu. Të dhënat gjenden në postën elektronike të drejtorit Gledis Nano.
Në vitin 2021, Njësia Kundër Terrorizmit në Kosovë ka zbuluar një plan për të vrarë kryeministrin Albin Kurti dhe dy persona të tjerë nga një shtetas nga Shqipëria. Raporti kategorizohet nga vetë Policia Shqiptare si “SENSITIV POR I DEKLASIFIKUAR”, ndaj newsbomb.al po e publikon të fragmentarizuar më poshtë.
“Njësia e Kundër Terrorizmit në Policinë e Kosovës (PK) ka marrë një informacion nga burime të Inteligjencës për një rast të kërcënimit me atentat ndaj Ismet Haxhës, Xhavit Halitit dhe Albin Kurtit. I dyshuari është Prek Kodra, shtetas shqiptar, i datëlindjes 01.05.1976, me pasaportë nr. ******** . Ai ka aftësi të mira në përdorimin e snajperëve dhe pushkëve. Ai dyshohet se është i përfshirë në disa vrasje në Kosovë dhe Mal të Zi.
Me shumë mundësi, ai jeton në Shkodër të Shqipërisë dhe operon në tre lokacione: Tropojë (Shqipëri) dhe Ferizaj dhe Deçan në Kosovë. Sipas autoriteteve të Policisë Shqiptare, ky person është me precedentë penalë dhe është hetuar nga Sektori i Krimit në Shqipëri për vrasje me paramendim dhe mbajtje pa leje të armëve të gjahut”, thotë dokumenti, i parë newsbomb.al.
- Sipas informacioneve, objektivi i parë është Ismet Haxha, i cili së shpejti do t’i bëhet atentat. Haxha është ish-pjesëtar i Shërbimit Informativ të Kosovës (SHIK) dhe i afërm i Kadri Veselit.
- Objektivi i dytë është Xhavit Haliti, deputeti dhe ish-deputeti i PDK-së, i cili do të vritet një muaj pas Haxhës, për ta bërë atë të duket si hakmarrje për atentatin ndaj Haxhës.
- Objektivi i tretë është kryeministri Albin Kurti, i cili do të vritet një muaj pas vrasjes së Halitit.
Qëllimi i këtyre atentateve është destabilizimi i Republikës së Kosovës. Me vrasjen e Albin Kurtit, partia VV do të dobësohet dhe PDK-ja dhe AAK-ja do të marrin udhëheqjen politike në vend dhe do të shpërbëhet Shërbimi i Sigurisë së Kosovës, thuhet në raportin e deklasifikuar të Policisë, dërguar nga homologët e Kosovës.
“Njësiti i Kundër Terrorizmit të PK-së ka identifikuar 17 persona që mund të kenë lidhje me këtë person dhe po ndërmerr veprime shtesë në terren për identifikimin e adresës së disa personave që mund të kenë lidhje direkte apo indirekte me këtë person”, vijon raporti.