Diplomatët iranianë u larguan ditën e sotme nga vendi ynë, pas vendimit të qeverisë për të ndërprerë marrëdhëniet diplomatike mes dy vendeve.
Stafit të ambasadës i ishte lënë kohë deri në orën 12:30 për t’u larguar, ndërsa para kësaj ata janë siguruar që të “zhduknin” çdo informacion të klasifikuar. Sipas Reuters, diplomatët iranianë dogjën dokumentet në orët e para të mëngjesit të sotëm.
Një dëshmitar tha për Reuters se ka parë “një burrë brenda ambasadës duke hedhur letra në një fuçi të ndryshkur dhe flakët ndriçonin muret e ambasadës trekatëshe”.
Nuk dihet se çfarë kishte në përmbajtje të atyre dokumenteve, ndërsa pas largimit të gjithë stafit, në godinën që ishte marrë me qira nga ambasada, hynë forcat e anti-terrorit ku zhvilluan një operacion të plotë kontrolli.
Kryeministri Edi Rama tha të mërkurën se “kishte urdhëruar diplomatët dhe stafin iranian të mbyllnin ambasadën dhe të largoheshin nga vendi brenda 24 orëve”.
Kreu i qeverisë u shpreh se sulmi kibernetik i korrikut ka pasur për qëllim “të paralizojë shërbimet publike, të fshijë sistemet dixhitale dhe të hakojë të dhënat shtetërore, të shkaktojë kaos dhe pasiguri në vend”.
Ëashingtoni, aleati më i afërt i Shqipërisë, fajësoi gjithashtu Iranin për sulmin dhe premtoi “të ndërmarrë veprime të mëtejshme për ta mbajtur Iranin përgjegjës për veprimet që kërcënojnë sigurinë e një aleati të SHBA”.
Teherani ka dënuar vendimin e Tiranës për të ndërprerë marrëdhëniet e saj diplomatike duke i quajtur si “pretendime të pabaza”, shkruan media prestigjioze.
Shqipëria dhe Irani kanë pasur marrëdhënie të tensionuara që nga viti 2014, kur Shqipëria pranoi rreth 3000 anëtarë të grupit opozitar në mërgim Organizata e Muxhahidëve Popullor të Iranit, e njohur edhe me emrin e saj farsi Mujahideen-e-Khalq, të cilët janë vendosur në një kamp pranë Durrësit, në vend.
