Zbulohet një mozaik i ri në bazilikën paleokristiane në Elbasan.
Gërmimet kanë treguar se kisha ka kaluar të paktën dy rindërtime madhore me nivel të lartë arkitektonik dhe artistik, të shoqëruara me vendosjen e mozaikëve të rinj dhe modifikime të tjera strukturore.
Që në javën e parë të sezonit të ri të gërmimeve, arkeologët kanë evidentuar elementë të rinj me rëndësi të veçantë shkencore, të cilët ndihmojnë në kuptimin më të plotë të evolucionit të monumentit gjatë shekujve V-VI, si dhe të zhvillimit ekonomik, kulturor dhe shoqëror të qytetit antik të Scampis.
Bazelika paleokristiane në Elbasan u zbulua rreth 2 dekada më parë, por pavarësisht zbulimit të detajeve të reja në çdo sezon, sërish qëndron e mbuluar për turistët e interesuar pasi kërkon financim shtesë për ta bërë të shikueshme, pa e dëmtuar.
