Presidentja e Kosovës, Vjosa Osmani, komentoi në një intervistë telematike se Vladimir Putin synon të përdorë Serbinë për të destabilizuar Ballkanin dhe bashkë me të edhe të gjithë Evropën Perëndimore.
Osmani shfrytëzoi rastin dhe bëri thirrje që shteti i saj të njihet nga vendet evropiane dhe të Amerikës Latine. Putin përpiqet të përdorë pushtimin e tij në Ukrainë si justifikim, duke e krahasuar atë me ndërhyrjen e NATO-s pa miratimin e Këshillit të Sigurimit të OKB-së në Kosovë.
Presidentja kosovare e cilëson këtë krahasim rus si “propagandë”, duke kujtuar se rreth 13 mijë njerëz u vranë në vendin e saj para ndërhyrjes së NATO-s. “Padyshim, Putini do të përpiqet ta përdor Serbinë për të destabilizuar rajonin tonë, sepse përmes rajonit tonë dëshiron të arrijë Evropën”, – tha Osmani.
Serbia, Bosnja Hercegovina dhe Kosova janë të vetmet vende në rajon që nuk janë pjesë e NATO-s. Në Bosnje dhe Kosovë ka kontigjente nga Bashkimi Evropian dhe Aleanca e NATO-s për të siguruar stabilitet.
Osmani thekson se ruajtja e paqes dhe stabilitetit në Ballkan “do të thotë ruajtje e paqes dhe stabilitetit në të gjithë kontinentin evropian”. Ajo kujton se Serbia ka kryer dhjetëra stërvitje ushtarake me Rusinë gjatë muajve të fundit.
Gjithsej, 117 shtete e kanë njohur Kosovën si shtet të pavarur deri më tani, ndërsa mungojnë jo vetëm pesë vende të BE-së, por edhe Kina, Rusia, India dhe shumica e vendeve të Amerikës Latine, si Argjentina dhe Brazili.
“Mendoj se anëtarësimi në NATO është vendimtar. Dua t’iu bëj një apel katër anëtarëve të NATO-s që ende nuk e kanë njohur Kosovën ta bëjnë këtë, sepse ne nuk duhet të vazhdojmë ta shohim këtë vetëm nga pikëpamja e politikës së brendshme”.
Serbia ka negociuar hyrjen e saj në BE që nga viti 2012, ndonëse procesi është i ngecur dhe Beogradi nuk duket i gatshëm të përafrojë politikën e saj të jashtme me atë të BE-së. Presidentja Osmani rithekson planet e qeverisë së Kosovës për të kërkuar këtë vit, siç sapo kanë bërë Gjeorgjia dhe Moldavia, anëtarësimin në BE, pavarësisht se në të kaluarën disa vende të bllokut kërkuan ndalimin e zgjerimeve.
