Presidenti i vendit Ilir Meta e ka quajtur një sulm ordiner dhe te papranueshëm, atë të kryeministrit Edi Rama në drejtim të politikanes Grida Duma. Meta kërkon që Rama të tëhiqet nga deklarata e tij dhe ti kërkojë ndjesë Dumës, pasi sulme të tilla nuk janë në zakonin dhe në traditën e shqiptarëve.
Gjatë ditës së djeshme, Rama duke komentuar kandidatët e PD-së nxori një foto provokuese dhe të montuar të Dumës, me komentin: Gridare, gridare ooo.
Reagim i Presidentit të Republikës, Sh.T.Z Ilir Meta
E dënoj me ashpërsi dhunën verbale dhe linçimin publik, të papranueshëm për traditën shqiptare dhe çdo shoqëri demokratike, të bërë ndaj zonjës, njëherazi nënë e një fëmije të mitur, Grida Duma.
Asnjë ndarje politike nuk mund t’i japë të drejtë revanshit të rrugaçërisë, për më tepër kur këto sulme të papranueshme për moralin njerëzor dhe etikën institucionale, konsumohen nga personat e veshur me autoritetin e shtetit.
Duke besuar në reagimin e fuqishëm të shoqatave që angazhohen për mbrojtjen e të drejtave të grave, i bëj thirrje Kryeministrit ende në detyrë, të kërkojë ndjesë publike dhe të tërheqë mbrapsht sulmin dhe fjalorin ordiner të përdorur ndaj zonjës Duma.
