Studentët janë ngritur sot në protestë para Ministrisë së Arsimit, siç kishin paralajmëruar më herët.
Ata kanë shprehur indinjatën e tyre për këtë vendim dhe theksojnë se mësimi online nuk është efektiv.
Ndërsa të tjerë thanë se dhe për këtë të fundit, nuk kanë pasur asnjë informacion se si do të zhvillohet.
“Prisja me zell të nisja mësimin, por na i prenë këtë zell. Prisja të nisja dhe mësim online, por as atë bnuk e nisa se nuk e dija as në cfarë ore isha, as me kë petagog, as cfarë lënde e mësim do bëja e një formular që e plotësova online, ma dërgoi një shoqe. Nuk kisha asnjë informacion, ishin listat e ndarjes me 10 nxënës secili e asgjë tjetër”, tha një nxënës.
“Nuk ka lidhje me virusin, është thjesht kontroll”, “Mësim online, fushata offline”, ishin disa prej pankartave të tyre.
Ajo që u vu re është se shumica prej tyre, dhe pse të grumbulluar para ministrisë, nuk mbanin maska.
Kjo, sepse disa prej tyre thanë që janë skeptikë për koronavirusin.
Sakaq, Policia i ka bërë thirrje studentëve për tu shpërndarë, pasi grumbullime të tilla nuk lejohen për shkak të pandemisë.
“Policia do të zbatojë ligjin”, dëgjoheshin thirrjet e policisë me megafon.
