Ansambli Kombëtar i Këngëve dhe Valleve Popullore sjell më 8 nëntor premierën “Shqipëri, O Nëna ime”, një koncert që bashkon zërat e mëdhenj të skenës shqiptare në një himn për atdheun. Tenorët Kastriot Tusha dhe Josif Gjipali e cilësojnë këtë bashkëpunim si një përvojë të veçantë dhe plot emocion në prag të festave kombëtare.
Në 8 nëntor, skena e Teatrit Kombëtar të Operas, Baletit dhe Ansamblit Popullor do të gjallërohet nga tingujt, ngjyrat dhe emocionet e koncertit premierë “Shqipëri, O Nëna Ime”, një produksion i ri i Ansamblit Kombëtar të Këngëve dhe Valleve Popullore, i cili i kushtohet dashurisë për vendin, traditën dhe rrënjët tona
Kjo shfaqje sjell një frymë të re bashkimi mes brezave e zërave të mëdhenj të skenës shqiptare. Përkrah solistëve të njohur të Ansamblit Aranit Hoxha, Malvina Likaj dhe Denisa Gjezo publiku do të ketë kënaqësinë të mirëpresë për herë të parë tenorin me famë ndërkombëtare Josif Gjipali, si dhe Artistin e Madh, Kastriot Tusha, dhe baritonin e talentuar Artur Vera.
“Për mua nuk është surprizë, por për të madhin Josif Gjipali që do ta kemi në mesin tonë e do të këndojmë këngët tona me rastin e festave të 28-29 Nëntorit. Repertori është shumë i bukur, ka një adrenalinë të mrekullueshme. Shpresoj që publiku ta pëlqejë.”
Nga ana tjetër, Gjipali e cilëson pjesëmarrjen e tij si një përvojë të re dhe emocionuese.
“Për mua është hera e parë që marr pjesë në një koncert të Ansamblit të Këngëve dhe Valleve. Do të thoja se është një eksperiencë e re. Jam i bindur që do të jetë një eksperiencë e bukur dhe e këndshme.”
Në këtë koncert do të marrin pjesë edhe solistët valltarë, të cilët do të sjellin në skenë pasionin, energjinë dhe shpirtin e traditës shqiptare. Një natë ku kënga dhe vallja shkrihen mrekullisht për të na kujtuar se arti është gjuha më e bukur e dashurisë për atdheun./Syri
