Më 17 qershor të vitit 1928, në Korçë, u krijua shoqëria artistike “Lira”, një nga shoqatat kulturore më në zë të kohës.
Nën drejtimin e pasionuar të Sotir Kozmos dhe dirigjimin e arbëreshit Paskal Anibales, kjo shoqëri gjallëroi jetën kulturore nga Korça në Tiranë.
Me formimin e shoqërisë artistike “Lira” më 17 qershor 1928, grupi i korit të qytetit të Korçës, u inkuadrua në këtë shoqëri. Kori kishte pasur aktivitet edhe përpara formimit të shoqërisë artistike. “Lira” pati vlera të pallogaritshme për zhvillimin e këngës patriotike në të gjithë Shqipërinë veçanërisht pas çlirimit të vendit nga pushtimi 500-vjeçar osman.
Instrumentistët si Luigj Filaj, Ilo Mosko, Vasillaq Ballauri, Nikolla Hançe dhe Isuf Ibrahimi, së bashku me studentët e arsimuar jashtë, që sillnin frymën evropiane, kontribuan në zhvillimin e muzikës qytetare korçare dhe asaj shqiptare.
Shoqëria artistike “Lira” lindi si një bashkim vlerash dhe talentesh, ku kori dhe orkestra harmonizuan origjinalitetin e artistëve vendas me përvojën e pedagogëve francezë të Liceut. “Lira” ishte një urë lidhëse mes traditës sonë popullore dhe kryeveprave botërore. Kjo shoqëri artistike shërbeu gjithashtu edhe si një qendër e rëndësishme artistike dhe patriotike, duke edukuar breza artistësh dhe duke ndikuar në kulturën tonë kombëtare.
