Nga Albert Vataj
Shkodra Elektronike nuk është veç një grup muzikor, por një shpërthim i dritës shpirtërore dhe trashëgimisë kulturore shqiptare në një skenë botërore si ajo e Eurovisionit. Këtë vit, në Bazel të Zvicrës, në edicionin e vitit 2025, ata sollën një paraqitje të jashtëzakonshme, një akt i rrallë ku modernja ndërthuret natyrshëm me rrënjët më të thella etnografike. Në çdo paraqitje të tyre, Shkodra Elektronike bëhet zë dhe pamje e një Shqipërie që ruan me krenari identitetin, duke e përthithur në format më bashkëkohore të artit muzikor dhe skenik.
Prezantimi në ceremoninë e hapjes së Eurovisionit, në tapetin e bruztë të yjeve, ishte një moment solemn e i paharrueshëm. Slogani i tyre, “Home is where qylym is”, tingëllon si një kredo shpirtërore që ngërthen brenda gjithë filozofinë e mikpritjes dhe të vatrës shqiptare. E thjeshtë në tingull, e thellë në kuptim, kjo thënie mishëron lidhjen organike ndërmjet njeriut dhe atdheut, ndërmjet trashëgimisë dhe përkatësisë.
Në qendër të kësaj paraqitjeje ishte Beatriçe Gjergji, që me fisnikëri dhe bukuri solli në skenë një fustan unik, të realizuar me dashuri nga nëna e saj, stilistja Irina Dema. Kostumi përçonte temën “Oda mikpritëse e gjyshes”, një udhëtim i ndjerë në kujtesën kolektive shqiptare. Elementet e fustanit përfshinin simbole tradicionale, punime artizanale dhe kujtime personale, ndër to, një çantë e vogël prej druri që dikur ruante bizhuteritë e gjyshes, tani e shndërruar në një relike simbolike e artit të kujtesës.
Në një kohë kur shumë artistë përpiqen të bien në sy përmes efekteve, Shkodra Elektronike ndriçoi përmes autenticitetit. Aty ku elektronika bëhet jehonë e lahutës, dhe aty ku ndriçimi modern përqafon hijen e oxhakut të shtëpisë, Shkodra Elektronike na dëshmon se e ardhmja më e ndritur është ajo që buron nga rrënjët.
Kjo paraqitje është një homazh për Shkodrën si djep kulture, për të gjitha nënat që thurin kujtesën në çdo qylym, për çdo gjyshe që trashëgon një botë në një kuti të vogël. Eurovisioni 2025 nuk ka pasur ndonjëherë një Shqipëri kaq të bukur, kaq të denjë, kaq të thellë në mesazhin e saj.
