Vendi ynë ka raportuar shifra në rritje të infektimeve me Covid gjatë ditëve të fundit, ndikuar dhe nga përhapja e variantit shumë ngjitës “Omicron”, por Komiteti Teknik i Ekspertëve vlerëson se masat aktuale kufizuese janë të mjaftueshme.
Epidemiologia Eugena Tomini tha se kjo javë ka pasur incidencën më të lartë gjatë dy viteve.
“Ka pasur një incidencë të lartë, piku më i lartë gjatë dy viteve”, tha Eugena Tomini.
Ndërsa, Shefja e Departamentit të Epidemiologjisë në ISHP-së, Silva Bino tha se është rritur ndërgjegjësimi i qytetarëve për t’u vaksinuar.
“Kemi pasur shifra të larta të vaksinimit të kësaj jave me dozën e parë, rritje e dyfishtë, ndërgjegjësim më të lartë. Kemi arritur 52% të të vaksinuarve me dozën e parë, 47% me të dyja dozat dhe 7.7% me tre doza. Duhet më tepër, po të shikojmë shfrytëzimin e vaksinave duket se është maksimal”, tha Silva Bino.
Zëvendësministrja e Shëndetësisë, Mira Rakacolli u shpreh se masat anticovid në vendin tonë nuk do të ndryshojnë, duke këshilluar qytetarët që të zbatojnë masat.
“Niveli është në përputhje me, do vijojnë aktivitet sportive në vetëm 30% të sallave ose ambienteve, hyrja do të vijojë të jetë e kontrolluar duke paraqitur green pass ose testin PCR 72 orë në kufi, ose testin e shpejtë 42 orë. Të nderuar qytetarë këshillohet zbatimi i masave që të mbrojnë veten, por edhe komunitetin, mbajtja e maskës”, tha Rakacolli.
Shefja e Infektivit, Najada Çomo tha se në spilar ka të rinj të shtruar të pavaksinuar.
“Ka të shtruar në spital, 12% në formë kritike. Ka edhe mosha të reja të pavaksinuar. 3, 4% e të shtruarve të vaksinuar me një dozë ose të dyja dozat”, tha Çomo.
Vendi ynë po përballet me shifra të larta infektimesh me COVID,ndërsa aktualisht ka 16,507 raste aktive. Tiranë kryeson me 8078 të infektuar, ndërsa pasohet nga Durrësi dhe Fieri, përkatësisht 1343 dhe 1329 të infektuar.
Që prej fillimit të pandemisë kanë humbur jetën 3,253 të infektuar./Tch
