Punimet restauruese në Gjirokastër po ruajnë pamjen origjinale të qytetit që mbledh me dhjetëra mijë turistë vendas e të huaj në çdo stinë të vitit.
Kështu, tashmë ka përfunduar edhe restaurimi i banesës “Angonatët”, e cila ruan karakteristikat e qytetit.
Lajmin e bëri të ditur ministri i Turizmit, Kulturës dhe Sportit, Blendi Gonxhja. “Angonatët” është monument kulture, Kategoria I.
Ministri sqaron se, ndërhyrjet e kryera në çati, fasadë dhe elementët mbrojtës i kanë dhënë banesës një pamje të re, duke ruajtur autenticitetin dhe duke e mbrojtur për gjeneratat që do të vijnë.
Ky kompleks banimi është një dëshmi e rrallë e arkitekturës gjirokastrite, ku dritaret e shumta, ballkoni unikal dhe prania e tre oborreve tregojnë për zhvillimin e banesës qytetare dhe përshtatjen e saj me kohën.
Kjo banesë gjendet në pikën më të dukshme të qytetit. Ajo është ndërtuar në vitin 1881 dhe është një shembull kuptimplotë për të treguar zhvillimin e banesës gjirokastrite dhe aftësinë e saj për t’iu përshtatur kushteve të jetës në zhvillim.
Banesa është e ndërtuar me mure guri shtresor. Dhomat janë të pajisura me tavane dekorativë dhe mjaft elementë të tjerë dekorativë.
