Partia Socialiste do të thërrasë të shtunën seancën parlamentare për zgjedhjen e presidentit të ri të Shqipërisë, bëjnë me dije burime nga PS-ja.
Seanca pritej që të zhvillohej të hënën, por do të mbahet në fundjavë për shkak të agjendës së kryeparlamentares Lindita Nikolla, e cila do të zhvillojë një vizitë jashtë vendit.
PS-ja do të mbledhë kryesinë të premten në orën 17:00, ku ndër të tjera në agjendë është edhe ecuria e procedurave të zgjedhjes së presidentit të Republikës dhe vendimmarrja e Partisë Socialiste.
Dje Kuvendi ezauroi pa asnjë kandidat edhe rundin e tretë për zgjedhjen e kreut të shtetit.
Sipas Kushtetutës, në rundin e 4-t dhe të 5-të presidenti zgjidhet me 71 vota.
