Sipas Drejtorisë Rajonale të Trashëgimisë Kulturore në Berat, në lagjet muzeale të qytetit prej disa kohësh ka nisur puna për mirëmbajtjen dhe restaurimin e portave të shtëpive. E ky projekt është vlerësuar si i veçantë.
“Ndërhyrjet e restaurimit në portat e banesave me të vjetra dhe më me vlera janë shumë më të rëndësishme ndonjëherë se kantieret e mëdha. Përkujdesja ndaj tyre është mision i përhershëm”, ka shkruar në rrjete sociale kjo Drejtori. Po aty ka shpërndarë fotografi nga puna e restaurimit të portës së banesës “Dollani”, monument kulture i kategorisë së parë, në lagjen “Kala”.
Shpesh portat në lagjet muzeale kanë pësuar transformime e ndërhyrje të cilat qoftë në formë, në detaje apo dhe në materialet e përdorura nuk kanë asnjë lidhje me monumentin.
Banesat karakteristike të qytetit të Beratit janë një dëshmi e vyer e diversitetit urbanistik dhe arkitektonik. Këto banesa reflektojnë influencat e traditës së banesave popullore ballkanike, që datojnë kryesisht në shekujt XVIII dhe XIX.
Në vitin 1961 Berati u shpall zyrtarisht “Qytet muze”. Sot ai trashëgon 210 objekte muzeale, nga të cilat 150 janë objekte më këmbë. Prej tyre 60 janë monumente të kategorisë së parë dhe të tjerat të kategorisë së dytë.
Në datën 8 korrik të vitit 2008, Berati u regjistrua në Listën e UNESCO-s nga Komiteti i Trashëgimisë Botërore në Konferencën e radhës të mbajtur në Kanada. Berati u vlerësua si një shembull i rrallë i arkitekturës tipike osmane. Berati, sipas UNESOC-s, “është dëshmitar i bashkëjetesës së komuniteteve të ndryshme fetare dhe kulturore përgjatë shekujve”. Në kriterin 3 të arsyes së futjes së Beratit në UNESCO shprehimisht thuhet se Berati dhe Gjirokastra janë një dëshmi e shquar e diversitetit të shoqërive urbane në Ballkan dhe të jetëgjatësisë së mënyrave të jetës, të cilat sot pothuajse janë zhdukur. Kriteri 4 thotë se dy qytetet janë dëshmi e jashtëzakonshme për llojet e ndryshme të monumenteve dhe banesave popullore urbane gjatë periudhës klasike osmane, në vazhdimësi me kulturat mesjetare që e paraprinë atë. Ky është një vlerësim mjaft i rëndësishëm për qytetin e Beratit, i cili renditet midis 600 vendeve të botës që janë në UNESCO si rrjedhojë e trashëgimisë së tyre universale.
