Aktori i mirënjohur shqiptar, Mehdi Malkaj, ishte dje i pranishëm në protestën paqësore të zhvilluar para Ministrisë së Brendshme për Mbrojtjen e Teatrit, së bashku me shumë aktivistë të tjerë.
Malkaj ngriti pyetjen se adoleshentët që dhunuan pronën publike, u dhunuan, po demonstruesit për Teatrin që mbrojnë pronën publike, pse rrihen.
“Policia jonë, kur të rreh, të rreh me dashuri. Dolën edhe adoleshentët, dogjën edhe pemën sintetike nga Kina. Për këtë, ata hëngrën dru. Tani, ne që kemi 3 vjet dhe nuk ndërpresim protestat, do të vazhdojmë derisa të kemi frymë. Ata hëngrën dru se shpartalluan pronën publike, po ne pse hamë dru, pse mbrojtëm pronën publike? Populli shqiptar thotë se ai që të rreh të do, po kur të rreh shumë si i bëhet?”, tha aktori Malkaj.
Ndërsa arkitekti Seranaj tha se dy ditë më parë punonjësit e Policisë nuk e lejonin të shkonte në pedonale, aty ku takohet çdo ditë me miqtë e tij.
Pedagogu Donald Martini tha se njëri prej policëve i ka gjuajtur me shpullë, kurse shton se kur u ul i gjuajtën edhe me shkelm. Martini shtoi se ka dalë sot në protestë për të ardhmen e fëmijëve të tij, ndërsa vlerëson se në Shqipëri ndodh që të vritesh edhe pa ndonjë motiv.
“Na futën në Polici. Njërit prej nesh i gjuajtën me shpullë. Kjo është dhunë, por në Shqipëri ndodh. Unë i thashë se kam edhe shtetësi angleze. Më tha ulu dhe kur jam ulur, më gjuajti me shkelm. Nuk isha mirë fizikisht, por më pas personi që më goditi direkt u largua, që ai të mos shihej. Më tej kisha dhimbje pak e më dilte gjak. Një oficer më tha se plaga jote ka 5 orë, e i thashë ‘po pse gjaku më rrjedh?’. Pastaj erdhi shefi i Komisariatit dhe u qetësua situata, por ishte vonë. Është e pakonceptueshme që të shoqërohesh në komisariat pse proteston. Unë protestoj në radhë të parë për fëmijët e mi, pastaj për të gjithë. Këtu vritesh edhe pa motiv. Do ta hedh në gjyq rajonin e Policisë. Kërkoj reagim edhe nga ministri i ri i Brendshëm”, deklaroi pedagogu Martini.
