Ikona e “Ungjillëzimit”, një thesar artistik, realizuar nga Onufër Qiprioti, i ka shpëtuar degradimit, falë laboratorit të Konservimit & Restaurimit në Muzeun Ikonografik “Onufri”.
![](https://shqip.com/app/uploads/2024/02/429989397_817638110407192_3436028150946464274_n.jpg)
Pas një pune disamujore, kryer nga restauratori Erion Lezi, përfundoi ndërhyrja restauruese për ikonën “Ungjillëzimi” vepër e shek XVI – XVII, atribuar Onufër Qipriotit.
![](https://shqip.com/app/uploads/2024/02/428657333_817638263740510_5978922276880074772_n.jpg)
Në këtë ikonë që ka funksionuar si Dera e Bukur e ikonostasit të kishës së Kostandinit dhe Helenës në kalanë e Beratit paraqitet skena e Ungjillizimit.
![](https://shqip.com/app/uploads/2024/02/428675595_817638347073835_8103954490009680778_n.jpg)
Në pjesën e poshtme kryeëngjëlli Gabriel, paraqitet duke lajmëruar virgjëreshën Marie për lindjen e shpëtimtarit ndërsa sipër qëndrojnë profeti Isaia dhe mbreti David.
![](https://shqip.com/app/uploads/2024/02/428680789_817638193740517_4255652469934126822_n.jpg)
Ikona edhe pse e restauruar përpara disa dekadash, paraqiste problematika të ndryshme si dëmtim të kornizimit e shtresave përgatitore, dëmtim të pelikulës piktorike kryesisht në gjysmën e poshtme, shoqëruar me papastërti të qëndrueshme të lëna nga restaurimi i mëparshëm dhe oksidim verniku.
![](https://shqip.com/app/uploads/2024/02/429898152_817638077073862_6451367992939333530_n.jpg)
Të gjitha këto copëtonin tërësinë e skenës, tjetërsonin elegancën dhe bukurinë e ikonës si dhe rrezikonin degradimin e saj.
![](https://shqip.com/app/uploads/2024/02/430023337_817638147073855_6622874360140036881_n.jpg)
Sot ikona paraqitet në shkëlqimin e plotë të saj dhe së shpejti do t’i ofrohet e ekspozuar publikut të gjerë të Muzeut “Onufri” të cilët mund të admirojnë më qartë mjeshtërinë dhe finesën e artit të Onufër Qipriotit. /atsh
![](https://shqip.com/app/uploads/2024/02/430101780_817638047073865_4976275655470157833_n.jpg)