US Albanian Media Group, ka filluar si një projekt modest, por frymezues, për të bërë bashkë shumë zemra shqiptare, në gjithë Shqiptarinë, por edhe në mërgatë, për t’iu gjendur sa më pranë njëri – tjetrit dhe vendit tonë, i cili po vuan jo pak, nga duart dhe mendjet e vetë shqiptarëve.
Projekti ynë fillimisht i quajtur “Usa Albanian Society”, evoluoi nga një organizatë patriotësh të pakursyer, në një fondacion që ka konkretizuar një seri projektesh, me jehonë në të gjithë Diasporën. Projekti fillestar u zhvillua dhe përparoi për tu bërë një angazhim me përmasa edhe më serioze. Tashmë të gjithëve na bashkon një emër i njohur si “Fondacioni Shqipëria Tjetër”, drejtuar nga miku ynë i nderuar Marin Mema.
Por kjo Shqiptaria jonë, nuk ka vetëm nevojë për “bukë” por edhe për zemër. Nuk ka nevojë vetëm për investime dhe shpenzime, por edhe për dinjitet, kujtesë dhe identitet. Zemrat shqiptare i bashkon, një histori, një kulturë, shumë tradita të lashtësisë dhe kostume të rralla, që duhen përmendur, studiuar dhe ruajtur, në mënyrë të atillë që t’i njihen botërisht popullit tonë e jo fqinjëve, që i kanë gjetur si vlera të jashtëzakonshme të braktisura rrugëve të historisë, po nga ne, për arsye se prej shumë vitesh s’kemi dashur e ditur tu dalim për zot. Në këtë drejtim rol parësor ka luajtur e do të luaj US Albanian Media Group, me prezencë në të gjithë mediat sociale. Qëllimi kryesor i punës së US Albanian Media Group, është të hedhë dritë e të sjellë pranë përdoruesit të thjeshtë të mediave sociale, faktet e panjohura e të fshehura të historisë, kulturës dhe identitetit të popullit tonë. Por edhe qëndrimet tona mbi dukuri të mprehta, socio-kulturore dhe socio-politike të aktualitetit.
Përmes njohurive mbi kulturën tonë dhe vlerat shqiptare, kultivohet edhe një respekt dhe dashuri për trojet am, për identitetin tonë e kësisoj mund të strukturohet një projektim pozitiv i të ardhmes në trojet e Shqiptarisë për të gjithë ata shqiptarë që e ndjejnë veten gurë të rëndë ne vendin e vet.
Falenderojmë gjithë miqtë tanë, për vëmendjen, mbështetjen e vazhdueshme dhe të pakursyer. Ata janë arsyeja kryesore që na shtyn të vazhdojmë kërkimet tona të mëtejshme.
Një popull me vetëdije të qartë kombëtare rrezaton integritet. Ne luftojmë për të artikuluar dita-ditës mijëra arsyet përse ky integritet dhe identiteti ynë kombëtar e socio-kulturor janë të paprekshëm e të patjetërsueshëm.
Kjo është edhe bërthama e synimit tonë, në respekt të atdheut.
Më poshtë vetëm disa foto dhe video nga aktiviteti ynë ndër vite:
