Në konferencën e përbashkët me Komisionerin për Zgjerimin e BE-së, Oliver Varhelyi, kryeministri Edi Rama nuk i ka kursyer edhe batuat teksa foli për progres-raportin e Bashkimit Europian dhe për faktin nëse vendet skeptike kanë ndryshuar mendje për anëtarësimin e Shqipërisë në BE.
Rama u shpreh se Shqipëria disa herë është përgatitur për “dasma”, por “kruqshqit nuk i kanë ardhur”. Kështu kryeministri konfirmoi se nuk do të ketë më përgatitje, por sapo BE t’i thërrasë në konferencë janë gati të vazhdojnë punën.
Rama: Unë nuk besoj që Finlanda, Suedia, apo shumë vende të tjera të BE janë më pak të ndjeshme se sa Holanda kur vjen puna te rimi, korrupsioni, siguria e kështu me radhë. Por ka një dinamikë të brendshme të ndryshme, në vende të ndryshme, që i bën vendet që ta shohin me sy tjetër raportin e progresit, sipas interesave të tyre. Është legjitime, janë interesat e tyre. Unë nuk bëj parashikime. Shpresoj që ne të vazhdojmë duke u ulur në tryezë në konferencën e parë ndërqeveritare sepse hapja e negociatave është dakordësuar mes të gjithëve.
Nga ana tjetër ne kaq shumë u mësuam duke u përgatitur për dasma e krushqit nuk na erdhën saqë tani i kemi lënë përgatitjet për dasma. Nëse do na thërrasin ne gati jemi, të veshur, ulemi dhe vazhdojmë punën. Nuk kemi asnjë shqetësim.
