Naftëtarët e Ballshit, në kundërshtim të demontimit dhe shitjes për skrap të rafinerisë së naftës, kanë zhvilluar mëngjesin e sotëm një tjetër protestë në ambientet e jashtme të uzinës.
Naftëtarët u ndeshën me një kordon të gjatë policor, të cilët ishin vendosur nga organet e rendit në mbrojtje të rafinerisë.
Ata të zhgënjyer thonë se prisnin rikthimin e uzinës në punë, si dhe marrjen e pagave të prapambetura dhe jo shitjen e saj për skrap.
Sipas tyre uzina është e vetmja mundësi punësimi në zonën e Ballshit dhe ndaj ata duhet të mobilizohen për të mos lejuar shkatërrimin e saj.
“Do ulemi aty të mbrojmë pronën tonë. Nëse nuk kanë dorë në vjedhje të na hapin portën dhe të shkojmë aty. Kemi lënë të gjithë pasurinë këtu brenda, ky fëmijë do të rritet përmes uzinës, jo nga hajdutët që do marrin lekët dhe do largohen”, tha një naftëtar që po protestonte aty.
Një tjetër naftëtar u shpreh se nga sot do të futen në grevë urie, pasi po u merret një pasuri e tyre dhe se policia është vendosur në mbrojtje të hajdutit.
“Sot do të marrim aktin final, do kalojmë në grevë urie. Nuk ka zgjidhje tjetër. Të bllokohen punimet, kujt t’ia kërkojmë këtë ne? Ministri i Brendshëm të vijë këtu, mos na fusin në konflikt me policinë. Këta me skafandra ne me duar bosh. Ça po bëhet këtu, si ka mundësi të ndodhë kjo? Policia e Shtetit po mbron hajdutin. Të na lejojnë të shkojmë te reparti ynë aty ku kemi derdhur djersën. Ne duam paratë tona. Të ndalohet vjedhja në uzinë”, shprehet një nga naftëtarët.
