Programi për shkëmbinin e të rinjve “Youth Exchange and Study –YES”, i ka hapur aplikimet online për vitin e ri shkollor. Nxënësit kosovarë që tashmë ndjekin mësimin në nivelin e mesëm të lartë, e kanë mundësinë që të aplikojnë online, për ta fituar mundësinë e ndjekjes së një viti shkollor në Shtetet e Bashkuara të Amerikës.
Deri më tani, në vitin e 17-të të funksionimit, programi akademik YES ka siguruar bursa për mijëra nxënës të shkollave të mesme nga shumë vende të botës, e po ashtu edhe nga Kosova.
Programi YES u themelua nga Kongresi Amerikan dhe financohet plotësisht nga qeveria e Shteteve të Bashkuara të Amerikës. Programi u siguron nxënësve të shkollave të mesme të përzgjedhur përmes konkursit, një bursë që të ndjekin mësimet për një vit shkollor në SHBA. Programi parasheh që ata të jetojnë në një familje mikpritëse vullnetare, dhe të studiojnë në një shkollë të mesme në SHBA, për të nxitur të kuptuarit mes njerëzve në Shtetet e Bashkuara dhe popujve të tjerë në botë.
Ndërsa për të aplikuar ju duhet të plotësoni këto kushte:
– Të jeni të lindur mes periudhës 1 janar 2004 dhe 15 korrik 2006.
– Të jeni nxënës të klasës së 10-të ose 11-të të shkollës së mesme.
– Të jenë nxënës me notën mesatare mirë ose shumë mire
– Të kenë mësuar gjuhën angleze dhe të demonstrojnë aftësitë në gjuhën angleze në kohën e regjistrimit për konkurs.
Nxënësit me aftësi të kufizuara duhet të jenë të regjistruar në një shkollë të mesme në vjeshtën e vitit 2020 dhe të jenë të lindur mes 15 shkurtit të vitit 2003 dhe 15 korrikut të vitit 2006.
Për të aplikuar për vitin akademik 2021-2022, ju duhet të vizitoni ueb faqen: https://ais.americancouncils.org/cgi-bin/WebObjects/AIR.woa/wa/login?brand=yes dhe të plotësoni një aplikacion të thejshtë të përbërë prej disa pyetjeve biografike dhe 3 eseve të shkurta. Me të dorëzuar aplikacionin ju do të kaloni në fazën e dytë e cila përbëhet nga një test online i gjuhës angleze.
Një komitet përzgjedhës do të vlerësojë aplikimet në internet dhe do të zgjedhë gjysmëfinalistët në nëntor. Gjysmëfinalistët do t’i nënshtrohen një aplikimi më të gjatë, një testi të aftësisë së gjuhës angleze, ese-ve si dhe do të intervistohen personalisht nga stafi i Këshillit Amerikan.
Nxënësit kosovarë mund të aplikojnë vetëm një herë në internet dhe mund të marrin pjesë vetëm në një intervistë. Ndonëse afati i fundit për aplikim është 15 tetor 2020, nxënësit kanë 10 ditë kohë që ta dorëzojnë aplikacionin online nga dita e nisjes së tij.
Për më shumë informata na kontaktoni në: yes.ks@americancouncils.org si dhe na ndiqni në faqen tonë në Facebook: YES Kosova / YES Alumni Kosova.
