Me iniciativën e gazetarit Marin Mema, në afërsi të zonës së Surrelit në Tiranë, është ngritur një memorial i cili përkujton grupet e para që u stërvitën ushtarakisht në formë të organizuar, me synimin për të çliruar Kosovën. Këto grupe u përgatitën 33 vjet më parë nga ushtarakët e ushtrisë shqiptare ku mes tyre në stërvitje morën pjesë, edhe Adem Jashari, Sali Çekaj, Zahir Pajaziti, Ilaz Kodra, sot dëshmorë.
Në ceremoninë e rastit kanë marrë pjesë personalitete të shumta nga Shqipëria, Kosova e Maqedonia.
Ish Presidenti i Republikës së Shqipërisë Alfred Moisiu e ka cilësuar shumë të rëndësishme këtë iniciative e cila sipas tij forcon identitetin dhe përkujton historinë. Për zotin Moisiu forcimi i lidhjes me kombin është domosdoshmëri, aq më tepër tek brezat e rinj.
Ndërkohë në emër të oficerëve të Forcave të Armatosura të Republikës së Shqipërisë, që i stërvitën këto grupe 33 vjet më parë, ish ushtaraku Ylli Mici theksoi se sakrificat e dëshmorëve nuk duhen harruar.
“Kujtimi dhe nderimi i tyre mbeten një detyrim”, theksoi Mici në fjalën e rastit.
Mesazhe gjatë këtij aktiviteti u përcollën jo vetëm nga familjarët e dëshmorëve, por edhe nga pjesëmarrësit në këto stërvitje sikurse z. Osman Ferizi.
Po kështu një fjalë të rastit ka mbajtur edhe Ambasadori i Republikës së Kosovës në Shqipëri z. Skënder Durmishi.
Një shqiponjë prej bronzi qendron mbi memorialin 5 metra të lartë, i cili është vendosur pranë repartit ku u zhvillua përgatitja ushtarake 33 vjet më parë.
Kjo vepër është realizuar me mbështetjen e shqiptarëve të thjeshtë, duke mundësuar kështu për kryeqytetin një simbol të fortë bashkimi, siç e quajti iniciuesi dhe realizuesi i projektit, gazetari i Top Channel, Marin Mema.
“Është koha që ne të ndihemi të fortë si shqiptar, prandaj për ne kishte shumë rëndësi ky memorial, që të kuptohet që ne jemi të gjithë bashkë, që ne duhet të jemi të gjithë bashkë, që ne nuk duhet të ndahemi kurrë, pavarësisht asaj historie të padrejtë që është përpjekur gjatë gjithë kohës të na mbajë të tillë. Ndaj, ne të gjallët sot, duhet të dijmë të respektojmë kujtimin e dëshmorëve, t’i vendosim këmbët fort në tokë dhe të kuptojmë se gjaku i tyre është i shenjtë. Ne duhet të përulemi me respekt ndaj veprës së dëshmorëve” tha ndër të tjera në fjalën e tij Marin Mema.
Mema falenderoi të gjithë mbështetësit e këtij projekti.
“Faleminderit për prezencën familjeve të dëshmorëve, faleminderit për fjalët e tyre, për forcën që transmetojnë.
Faleminderit për nderimin familjeve Jashari, Çekaj, Pajaziti, Kodra, Hoxha e Qerimi! Përulem me respekt për çdo dëshmor!
Faleminderit skulptorit Ardian Pepa, i cili krijoi një vepër vërtet dinjitoze, duke e materializuar idenë në një formë të rrallë artistike, ku ndjenjat dhe historia u shkrinë së bashku.
Faleminderit të gjithë pjesëmarrësve në përurimin e memorialit dhe padyshim faleminderit të gjithë atyre që e mbështetën këtë projekt.
Faleminderit 289 dhuruesve, që secili me mundësitë e tij, i dhanë jetë këtij memoriali.
Faleminderit z. Lazim Destani, që ka qenë një ndër mbështetësit e rëndësishëm dhe që ka shprehur menjëherë gadishmrinë e tij për të qenë pranë projektit.
Faleminderit bashkëpuntorëve të mi Behlulit, Albinit, Vilsonit, Mevlanit, Klodianit që edhe pse larg kanë qenë gjithmonë një mbështetje e fortë! Janë thjesht të jashtëzakonshëm! Pa harruar Elisin dhe Ilirin dhe shumë miq të tjerë! Faleminderit Arditit që gjithmonë është aty me mua.” Theksoi me të tjerash gazetari në falenderimin e tij publik.