Presidentja e Kosovës, Vjosa Osmani, në një letër drejtuar presidentit amerikan Joe Biden, ka kërkuar që Shtetet e Bashkuara të Amerikës të përkrahin Kosovën në rrugën e saj për pranim në NATO.
Në letrën e saj, të cilën e ka siguruar KOHA, Osmani ka falënderuar Bidenin për urimet për 14-vjetorin e pavarësisë, ndërsa më pas ka shkruar për progresin e shtetit dhe shndërrimin nga një shtet i sapodalë prej luftës në një vend demokratik. Ka përmendur edhe vendosjen e sanksioneve ndaj Rusisë, siç kanë bërë vendet perëndimore.
“Integrimi euroatlantik gjithmonë ka qenë qëllimi ynë, por sot – në kuadër të ngjarjeve të paprecedentë në kontinentin e Evropës – është prioriteti ynë kryesor i sigurisë kombëtare. Evropa po përballet me kohët më të errëta dhe më të rrezikshme që nga fundi i Luftës së Ftohtë. Teksa ndajmë të njëjtin qëllim për mbrojtje dhe promovim të sigurisë globale, pranimi i Kosovës në NATO është i domosdoshëm. Argumentet kundër pranimit të Kosovës në NATO nuk i marrin parasysh imperativin e sigurisë në Ballkanin Perëndimor dhe nuk i shërbejnë interesit të botës së lirë demokratike, që është nën rrethim në rritje nga tendencat autoritare dhe politikat e tyre agresive”, ka thënë Osmani në letrën e saj.
Në letrën e saj, Osmani ka thënë se Kosova tashmë e ka dëshmuar përse e meriton, beson dhe duhet të jetë shtet pjesë e familjes euroatlantike.
“Kosova është shteti më proamerikan dhe më pro-NATO në botë”, ka thënë Osmani duke kujtuar sfidat e Kosovës si shtet që ka vuajtur për dekada për liri.
“Si presidente e Republikës së Kosovës e di që Politikat e Sigurisë Kombëtare të Amerikës për Evropën është e përqendruar në një Evropë të lirë, të plotë dhe me paqe dhe që integrimi i plotë i Ballkanit Perëndimor në strukturat euroatlantike është pjesë e marrëdhënieve të qëndrueshme trasantlantike. Me këtë në mendje, ne shprehim besimin dhe pritjen që SHBA-ja do ta përdorë lidershipin dhe ndikimin e saj për të përkrahur dhe avancuar procesin kompleks të pranimit të Kosovës në NATO, duke nisur nga programi Partneriteti për Paqe dhe pranimi i plotë në Kartën e Adriatikut”, ka thënë tutje presidentja.
Teksa ia ka kujtuar Bidenit rreziqet me të cilat përballet Kosova për shkak të ndikimit rus, Osmani ka thënë se nisja e procesit të pranimit të Kosovës në NATO do të kontribuonte në konsolidim përballë kërcënimeve ruse.
