Qendra e Studimeve dhe Publikimeve për Arbëreshët ka njoftuar se ka nënshkruar marrëveshje me Rajonin e Puljas, ku, përveç të tjerash, synohet promovimi i mësimit të arbërishtes në komunat arbëreshe të Italisë.
“Në kuadër të vizitës në Pulja, drejtoresha e Qendrës së Studimeve dhe Publikimeve për Arbëreshët (QSPA), prof. Diana Kastrati, ka nënshkruar marrëveshjen e bashkëpunimit me Rajonin e Puljes të përfaqësuar nga Sebastiano Leo, këshilltar i Rajonit të Puljes, me drejtorin e Teatrit të Puljes, Sante Levante, drejtorin e Zyrës Rajonale të Arsimit, Giuseppe Silipo, dhe me kryetarët e bashkive arbëreshe të San Marzanos, Chieutit, Casalvecchio di Puglia, përkatësisht Giuseppe Tarantino, Diego Lacono dhe Noe Andreano”, shkruhet në njoftim, raportojnë mediat në Shqipëri. Sipas njoftimit, marrëveshja e nënshkruar mes këtyre gjashtë enteve synon bashkëpunimin në disa fusha, si në arsim, art, kulturë të komunave arbëreshe. Në kuadër të marrëveshjes theksohet ajo për promovimin e të mësuarit të arbërishtes në shkollat në komunat përkatëse brenda kuadrit ligjor italian dhe Kartës Evropiane të Gjuhëve Rajonale ose Minoritare.
Qendra e Studimeve dhe e Publikimeve për Arbëreshët (QSPA) është institucion kërkimor shkencor për diasporën shqiptare. Kryen studime në fushën e historisë, letërsisë dhe të kulturës së komunitetit arbëresh. Krijimi i këtij institucioni u miratua me vendimin e Këshillit të Ministrave të Shqipërisë, në shtatorin e vitit 2019.
“Misioni i Qendrës së Studimeve dhe Publikimeve për Arbëreshët (QSPA) është kryerja e studimeve të specializuara për historinë, letërsinë dhe kulturën e komunitetit arbëresh, nëpërmjet nxitjes së bashkëpunimit mes studiuesve të fushës vendas dhe në diasporë e më gjerë, me qëllim mbështetjen dhe zhvillimin e strukturës së studimeve mbi komunitetin arbëresh”, thuhet në ueb-faqen zyrtare të QSPA-së. Po aty shkruhet se pjesë e misionit është vlerësimi i mëtejshëm i marrëdhënieve me komunitetin arbëresh në botë, përmes organizimit të aktiviteteve dhe konferencave shkencore. “Ato do të kenë në fokus cilësimin e historisë së komunitetit arbëresh, si pjesë e shkencës albanologjike, por edhe rivlerësimin e marrëdhënieve të vendlindjes me komunitetin shqiptar më të vjetër në diasporë”, shkruhet aty./koha.net
