Avdullah Hoti, Kryeministri në detyrë i Kosovës, ka thënë se vaksinat e para kundër koronavirusit do të arrijnë në Kosovë në muajin shkurt.
“Ne, sikurse në vendet e rajonit, presim që vaksinat e para të vinë në muajin shkurt “, ka thënë ai në një konferencë për media.
Hoti ka treguar se të martën janë konkretizuar negociatat me kompaninë amerikane “Pfizer” për sigurimin e 535 mijë dozave të vaksinës. Ai ka thënë se janë kontretizuar edhe bisedat me Austrinë për 600 mijë vaksina.
“Dje janë konkretizuar bisedat me Pfizer për 535 mijë vaksina, janë konkretizuar gjithashtu edhe bisedat me Austrinë për 600 mijë vaksina, dhe me COVAX më herët janë kryer të gjitha procedurat e aplikimit për 720 mijë vaksina”, ka thënë Hoti.
Kryeministri në detyrë i Kosovës e ka prezantuar edhe strategjinë për vaksinimin e popullatës kundër COVID-19. Ai ka thënë se janë tri grupe që do të kenë prioritet për vaksinim: punonjësit dhe stafi shëndetësor, personat mbi 65 vjeç dhe personat me sëmundje kronike.
“Fillimisht vaksinohen mjekët dhe stafi shëndetësor duke qenë se këta janë në ballë të pandemisë, mandej personat mbi moshën 65 vjeç duke filluar nga më të moshuarit e duke ardhur më poshtë, pastaj personat që kanë rrezikshmëri të lartë”, ka thënë Hoti.
Ai ka thënë se në Kosovë pritet të vaksinohen 20 mijë qytetarë në ditë.
Ministri në detyrë i Shëndetësisë, Armend Zemaj, ka thënë se Kosova po negocion edhe për sigurimin e më shumë vaksinave.
“COVAX dhe Pfizer nuk janë të vetmet mundësi që ne kemi shqyrtuar për sigurimin e vaksinave. Kemi kontaktuar, identifikuar dhe negociuar edhe me shtete veç e veç nga Bashkimi Evropian”, ka thënë ai.
Zemaj ka thënë se Kosova ka aplikuar edhe për asistencë teknike, që nënkupton asistencë për ruajtjen, shpërndarjen dhe vaksinimin e populates. Ai ka thënë se vaksinimit do t’i paraprijë një fushatë informuese.
Zemaj ka theksuar se të gjitha vaksinat do të jenë falas.
