Ambasadorja amerikane Yuri Kim ka rezultuar pozitive me Covid-19. Lajmi është bërë me dije nga vetë Yuri Kim përmes një postimi në rrjetet sociale.
“Miq, dua t’u bëj me dije që jam testuar pozitive me Covid-19. Do të vazhdoj të kryej detyrat e mia duke u vetëizoluar në shtëpi në ditët e ardhshme.
Ju faleminderit për të gjitha urimet dhe ju lutem ruani vigjilencën për shëndetin tuaj!”, shkruan ambasadorja në “Twitter.
Sjellim në vëmendje që dje ambasadorja Yuri Kim ishte në qytetin e Durrësit, ku zhvilloi takime me drejtues të Portit dhe Doganës. Pas takimeve kryediplomatja dha një prononcim të shkurtër për gazetarët, ku foli për dekriminalizimin dhe zgjedhjet e 25 prillit.
Kujtojmë që më herët janë infektuar me Covid-19 edhe ambasadori i BE në Shqipëri Luigi Soreca, gjendja e të cilit u paraqit e qëndrueshme. Po ashtu janë prekur me Covid-19 edhe ministra e deputetë, apo kryebashkiakë të njohur.
