Në Bashkinë e Finiqit janë fshirë emërtimet shqipe të disa vendeve, duke lënë kështu vetëm ato greke. Kjo nuk është herë e parë që ndodh në këtë bashki, pasi edhe më herët janë denoncuar vandalizma dhe provokime të tilla, për të cilat nuk ka mbajtur përgjegjësi askush.
Finiqi është një vendbanim i banuar kryesisht me banorë që kanë marrë shtetësinë greke në bazë të vetdeklarimit. I konsideruar qytet ose fshat dhe bashki në Qarkun Vlorë, ndodhet 8 km nga Deti Jon dhe 20 km në veri të kufirit grek.
Është njohur si një nga dy bashkitë e pakicave kombëtare greke bashkë me Dropullin.
Qyteti i lashtë i Finiqit përbën një vlerë të madhe historike dhe arkeologjike, pjesë e pa ndarë e trashëgimisë tonë kulturore.
Qyteti antik i Foinikës mori statusin Park Arkeologjik Kombëtar në vitin 2005.
Foinikia ka një histori të lashtë. Ajo ka qenë kryeqendra e Kaonëve, ilirë të lashtë, ndërsa në shekullin III u bë kryeqyteti i gjithë shtetit të Epirit. Sipas Polibit, ka qenë qyteti më i fortifikuar i Epirit. Ngrihej në një kodër në formën e një anijeje të përmbysur.
