Kreu i qeverisë shqiptare Edi Rama ka zhvilluar një takim me ish-kryeministrin britanik Tony Blair. Lajmi është bërë i ditur nga BalkanWeb. Mësohet se takimi është zhvilluar në vilën qeveritare.
Ish-kryeministri britanik është parë shpesh të vijë në vendin tonë, dhe të ketë takime me kryeministrin Rama.
Ky i fundit do të jetë i pranishëm në mbledhjen e sotme të grupit parlamentar socialist, ku të gjithë deputetët do të dorëzojnë një zarf me tre emra si kandidatë të mundshëm për postin e presidentit.
Rama ngarkoi disa javë më parë Taulant Ballën, Elisa Spiropalin dhe Damian Gjiknurin që të kryesojnë socialistët në negociatat e zgjedhjes së presidentit, ndërkohë që dhe qytetarëve do tiu jepet e drejta që të japin propozimet e tyre, duke shkuar drejt një identikiti të presidentit që do të ishte më i pëlqyeshëm.
Një tjetër temë që pritet të diskutohet në mbledhjen e sotme të grupit parlamentar, është edhe ajo mbi deputetin Ornaldo Rakipi, babai i të cilit u shpall non grata nga Shtetet e Bashkuara të Amerikës, edhe pse vendimi nuk prek direkt familjarët e tij.
Vetë deputeti i ri, në moshë dhe eksperiencë, do të shprehej pak ditë më parë se babai i tij ishte i pastër, dhe këtë do ta vërtetojë edhe në organet e drejtësisë në SHBA, sa kohë që sanksionet ekonomike që u aplikuan nga DASH për Rakipin janë të apelueshme.
Nga ana tjetër Rakipi, është një prej deputetëve më të votuar personalisht në zgjedhjet e 25 Prillit, duke thyer dhe herësin e famshëm të vendosur për listat gjysmë të hapura. Votat personale që ai mori, bënë diferencën në rezultatin e përgjithshëm të zgjedhjeve në kryeqytet.
Qëndrimin e grupit për Rakipin pritet ta komunikojë pas mbledhjes Taulant Balla, ndërkohë që socialistët do të duhet të tregojnë se standardi për non grata, duhet të jetë i ndryshëm nga ai që akuzojnë kundërshtarin e tyre Sali Berisha.
Sa i takon zgjedhjes së presidentit, pas mbledhjes së sotme, Taulant Balla njoftoi se gjatë ditës së nesërme do të ftojë në një takim dhe krerët e grupeve parlamentare të opozitës, Enkelejd Alibeaj, Fatmir Mediu dhe Mesila Doda, prej të cilëve asnjëri nuk e ka pranuar publikisht ftesën.
Zgjedhja e presidentit në tre raundet e para kërkon shumicë të cilësuar, të cilën për momentin PS nuk e ka, ndërkohë që në raundin e katërt presidenti mund të zgjidhet me 71 vota. Socialistët pretendojnë se procesi i udhëhequr prej tyre do të jetë një model, edhe pse zëra të ndryshëm thonë se vendimi final do të jetë i Ramës, i cili do të tentojë të luajë me elementin surprizë.
