Kreu i Partisë Demokratike Sali Berisha ka deklaruar pasditen e së mërkurës në mbledhjen e Grupit Parlamentar të kësaj partie se kryeministri Edi Rama e di se ku ndodhet Ervis Martinaj. Po ashtu, ish-kryeministri e akuzoi prokurorinë se kontrollohet nga kreu i qeverisë.
Berisha argumentoi se ky institucion nuk i ka përgënjeshtuar raportimet se po mban një trup të ndarë në gjashtë copa. Ndërsa e akuzoi Ramën se i ka shtrirë “tentakulat” në çdo sektor të vendit, kryedemokrati tha qeveria ia mori lojërat e fatit Martinajt dhe tani pyet se ku është.
“Nuk ka sektor që ky nuk ka shtrirë tentakulat e veta. Ia morën lojërat e fatit Ervis Martinit dhe tani thotë ku është. E di vetë ai ku është. Ai ishte biznesmen i lojërave të fatit. Olsi Rama është përfolur si njeriu në hije i lojërave të fatit. Shko e pyet Baton Stanishiçin dhe Ymer Çorapen se ata e dinë. A nuk shkruajtën ata se është në gjashtë copa në prokurori. Një njeri i zhdukur dhe një shtet bandit që thotë se është në gjashtë copa në prokurori.
Do thoni ju, nuk e tha Fuga, por e thanë Fugat e tij. A ka njerëz më të afërt? A nuk ishte Baton Stanishiçi që na thoshte para tre muajsh se Linda është për presidente. Ai nuk e thoshte nga mendja e tij. Ai është zëdhënës i familjes në këtë formë. Po kjo çfarë prokurorie është që thuhet se mban një trup me gjashtë copa dhe nuk bën një përgënjeshtrim? Sepse kontrollohet nga Rama. Nëse është në gjashtë copa, familja njoftohet. Është kod shekullor,” deklaroi Berisha në mbledhjen e Grupit Parlamentar të PD-së.” /abc